Նորություններ

Պաշտոնական

Հանձնաժողովի նիստ ԱԻՆ-ում

15:05 / 08.04.2016

Ապրիլի 8-ին ՀՀ ԱԻ նախարարությունում կայացավ Անտառային հողերում, բնության հատուկ պահպանվող տարածքներում, գյուղատնտեսական նշանակության հողատեսքերում և բնակավայրերում բուսածածկ տարածքների հրդեհների կառավարման ազգային քաղաքականության իրագործմանն ուղղված գործողությունները համակարգող միջգերատեսչական հանձնաժողովի առաջին նիստը:

Հանդիպման նպատակն էր ՀՀ շահագրգիռ կառույցների հետ քննարկել բուսածածկ տարածքների հրդեհների կանխարգելման, դրանց հետևանքների նվազեցման և վերացման ուղղությամբ տարվող աշխատանքներն ու առկա խնդիրները:

Նիստին մասնակցում էին ՀՀ պաշտպանության, գյուղատնտեսության, բնապահպանության նախարարությունների և ոստիկանության ներկայացուցիչներ:

Մասնակիցներին ողջունեց ՀՀ ԱԻ փոխնախարար Համլետ Հակոբյանը՝ ներկայացնելով հանձնաժողովի հիմնական գործառույթները.

- Մեր նպատակն է քննարկել անտառային հրդեհների պատճառները, բացահայտել խնդիրներն ու նոր մոտեցումներ ներկայացնել՝ դրանց հետևանքների վերացման ուղղությամբ: Տարեկան լինում է մոտ 200.000 հրդեհ, որոնք մեծ վնաս են հասցնում թե´ բնապահպանության ոլորտին, թե´ կենդանական աշխարհին: Իսկ պատճառները կա´մ կլիմայական փոփոխություններն են, կա´մ մարդկային գործոնը:

Նիստին ՀՀ ԱԻՆ պետական հրդեհային և տեխնիկական անվտանգության տեսչության պետ Ա. Մկրտչյանը ներկայացրեց 2015 թ. կատարված աշխատանքները և 2016 թ. նախատեսվող անելիքները:

Փրկարար ծառայության կողմից կատարված միջոցառումները ներկայացրեց ՀՀ ԱԻՆ ՓԾ տնօրենի տեղակալ, փ/ծ գեներալ-մայոր Վ. Գաբրիելյանը.

- Մենք մշակել և կառավարությանն ենք ներկայացրել բուսածածկ տարածքների կանխարգելման, դրանց հետևանքների նվազեցման և վերացման մասին իրավական ակտերում փոփոխություններ կատարելու մեր առաջարկությունները: Համագործակցելով այլ գերատեսչությունների հետ` մշակում և ռիսկային համայնքների բնակչությանն ենք տրամադրում ուղեցույցեր՝ հրդեհների դեպքում վարվելակերպի կանոնների վերաբերյալ: Կազմակերպվել են նաև ուսումնավարժանքներ, խորհրդակցություններ և սեմինարներ, որտեղ ընդգրկված են եղել շահագրգիռ բոլոր մարմինները:

Վ. Գաբրիելյանը նշեց նաև, որ հաջորդ կարևորագույն քայլը խոշոր բուսածածկ տարածքներին մոտ համայնքներում կամավոր հրշեջ ջոկատների ստեղծումն է, քանի որ անտառները բնակչության համար ունեն նաև սոցիալական նշանակություն:

ՀՀ ԱԻՆ Ճգնաժամային կառավարման պետական ակադեմիայի ռեկտոր, փ/ծ գնդապետ Հ. Մաթևոսյանը զեկուցեց, որ պարբերաբար կազմակերպվում են վերապատրաստման դասընթացներ, որոնց ևս մասնակցում են տարբեր գերատեսչությունների աշխատակիցներ: Դասընթացներն ընթանում են հատուկ մշակված ուղեցույցերով:

2015 թ. կատարված աշխատանքներն ամփոփեցին նաև ՀՀ պաշտպանության, բնապահպանության և գյուղատնտեսության նախարարությունների ներկայացուցիչները՝ նշելով թեմային առնչվող նոր առաջարկություններ:

Հանձնաժողովն առանձնահատուկ ուշադրություն դարձրեց բուսածածկ տարածքներում ականների առկայությանը, որոնք հրդեհների ժամանակ լուրջ խոչընդոտ են հանդիսանում հրդեհաշիջման աշխատանքներին և ներկայացնում մեծ վտանգ: ՊՆ ներկայացուցիչը նշեց, որ ականազերծման համապատասխան աշխատանքները տարվում են, կատարվում է քարտեզագրում:

Ամփոփելով միջգերատեսչական հանձնաժողովի առաջին նիստի արդյունքները՝ Հ. Հակոբյանը նշեց, որ անելիքները շատ են, հարկավոր է միասնական ջանքերով մշակել և առաջ քաշել անհրաժեշտ նոր մոտեցումներ՝ աշխատանքն ավելի արդյունավետ դարձնելու համար:

 

← Վերադառնալ ցուցակին