ՀՀ արտակարգ իրավիճակների
նախարարություն

Այսօր ԱԻ նախարարությունում տեղի ունեցավ ԱԻՆ գիտատեխնիկական խորհրդի հերթական նիստը, որը վարում էր խորհրդի նախագահ Ա. Երիցյանը։

Նախքան օրակարգի հարցերին անցնելը նախարար Ա. Երիցյանը շնորհավորեց ԵՊՀ պրոֆեսոր Ռ.Մինասյանին `Քաղաքաշինության նախարարի կողմից խրախուսման արժանանալու և ոսկե մեդալով պարգևատրվելու առիթով: Նախարարն անձամբ փոխանցելով պարգևը, մասնավորապես ասաց.

- Մենք բոլորս գնահատում ենք Ձեր երկարամյա աշխատանքը և գիտական ներդրումն այս ոլորտում, մենք շարունակելու ենք աշխատել միասին և վստահ եմ, որ անելիքներ դեռ շատ ունենք:  

Օրակարգում ընդգրկված առաջին հարցը վերաբերում էր հայկական ատոմակայանի հեղուկ ռադիոակտիվ թափոնների վնասազերծման նոր տեխնոլոգիային, որի շուրջ իր առաջարկությունները ներկայացրեց ԵՊՀ պրոֆ. Ռ.Գևորգյանը: Անդրադառնալով խնդրի կարևորությանը, պրոֆեսորն ընդգծեց, որ իր մշակած նոր տեխնոլոգիան բնական սորբենտների՝ հանքանյութերի օգնությամբ հնարավորություն կտա ֆիլտրել ատոմակայանի հեղուկ ռադիոակտիվ թափոնները՝ զգալիորեն նվազեցնելով վերջիններիս վնասը:

Հաջորդ հարցը պրոֆ. Ս. Նազարեթյանի <<Սպիտակի 1988թ. երկրաշարժի գոտու քաղաքների տարածքների սեյսմիկ վտանգը և ռիսկը>> մենագրության և ԵՊՀ պրոֆ. Ռ.Մինասյանի գրախոսականի ներկայացումն էր:
Անդրադառնալով գրքի հարուստ բովանդակությանը, Ս.Նազարեթյանը նշեց, որ այն ընդգրկում է վերջին 10 տարիների ընթացքում հավաքած արժեքավոր նյութերի վիճակագրությունը, որը ներկայացված է հատուկ սեյսմիկ սանդղակով: Հեղինակն առաջարկում է մի շարք փոփոխություններ կատարել սեյսմակայուն շինարարության նորմերում: Մենագրության մեջ ներկայացվել է սեյսմիկ ռիսկի նվազեցման նոր մեթոդաբանություն, որի հիմքում ընկած է Սպիտակի երկրաշարժի ուսումնասիրված փորձը: Մշակվել և գնահատվել են ՀՀ փոքր քաղաքների սեյսմիկ ռիսկերը և կազմվել են սեյսմաշրջանացման քարտեզներ: Ռ.Մինասյանն իր գրախոսականում կարևորելով գրքի արժեքը` ասաց.

- Ներկայացված աշխատանքը սեյսմաբանական բնագավառում եզակի է: Իրոք այն կարևոր աշխատություն է՝ և՜ մեթոդաբանության, և՜ գործնական, կիրառական տեսակետից:
Խորհրդի կողմից քվեարկության արդյունքում որոշում ընդունվեց Ս. Նազարեթյանի աշխատանքը ներկայացնել պետական մրցանակի:

Նիստի վերջում սեյսմիկ ռեժիմի համառոտ վերլուծությամբ հանդես եկավ ՀՀ ԱԻՆ ՍՊԾ մասնագետ Ս.Մարգարյանը` անդրադառնալով օգոստոսին իրար հաջորդած 3 երկրաշարժերին:

Նիստի ավարտին գիտխորհրդի նախագահ, նախարար Ա. Երիցյանի կողմից տրվեցին հանձնարարականներ՝ ուսումնասիրել և առաջարկություններ ներկայացնել քննարկված խնդիրների վերաբերյալ: