Դիմեք մեզ

Հոգեբանական ծառայություն

 ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐՈՒԹՅԱՆ ՃԳՆԱԺԱՄԱՅԻՆ ԿԱՌԱՎԱՐՄԱՆ ԱԶԳԱՅԻՆ ԿԵՆՏՐՈՆԻ ՀՈԳԵԲԱՆԱԿԱՆ ԾԱՌԱՅՈՒԹՅՈՒՆ

ՃԿԱԿ 911-ը գործարկում է հոգեբանական նոր ծառայություն

 

«Այն, ինչ մեզ չի սպանում, դարձնում է ավելի ուժեղ»
Նիցշե

      Ճգնաժամային, սթրեսային իրավիճակները մարդու կյանքի մշտական ուղեկիցներն են: Ցանկացած նոր խնդրային իրավիճակ, որի առջև կանգնում է մարդը,պարունակում է երկու հիմնարար հարց. «Ինչու՞» և «Ինչպե՞ս»: Ավստրիացի հոգեբույժ և հոգեբան Վիկտոր Ֆրանկլն ասել է. «Եթե գիտես «ինչու», կարելի է դիմանալ ցանկացած «ինչպես»-ի»: Հաճախ, հայտնվելով կյանքի դժվարին իրավիճակում, մարդը չի կարողանում ինքնուրույն գտնել այս հարցերի պատասխանները, ինչի արդյունքում նրա մոտ կարող են առաջ գալ անելանելիության, կյանքի անիմաստության հետ կապված մտքեր և արդյունքում՝ բացասական բնույթի տարբեր ապրումներ:

     Դժվարին իրավիճակներում համապատասխան հոգեբանական խորհրդատվության, հուզական աջակցության ցուցաբերման նպատակով 2014 թ.մայիս ամսից ՀՀ ԱԻՆ աշխատակազմի ՓԾ ՃԿԱԿ «911» ծառայության Կենտրոնական ահազանգման կենտրոնում բացվեց նոր շուրջօրյա անվճար հեռախոսային հոգեբանական խորհրդատվական ծառայություն, որի գլխավոր նպատակն է բնակիչներին հուզական աջակցության ցուցաբերումը և հոգեբանական խորհրդատվության տրամադրումը:

     Ծառայությունը, հիմնվելով գաղտնապահության, անանունության, մարդասիրության, անշահախնդրության, հանդուրժողականության, մարդու ազատության հիմնարար սկզբունքների վրա, աշխատում է հետևյալ հիմնական ուղղություններով.

•  Ճգնաժամային հոգեբանական խորհրդատվության և աջակցության ցուցաբերում բոլոր այն քաղաքացիներին, ինչպես նաև դեպքի վայրում տուժածներին, ովքեր հայտնվել են ճգնաժամային, սթրեսային հոգեվիճակում, ունեն վարքի վտանգավոր, ծայրահեղ դրսևորման միտումներ:
•  Հոգեբանական խորհրդատվության տրամադրումներ անձնային, միջանձնային հոգեբանական խնդիրների և կոնֆլիկտների առկայության դեպքում:
Հոգեբանական աջակցության ցուցաբերում տարիքային տարբեր խմբերի ահազանգողներին՝ ելնելով տարիքային փուլերի հոգեբանական առանձնահատկություններից:
•  Հոգեբանական խորհրդատվություն և աջակցություն վախերի, տագնապային վիճակների, ֆոբիաների, կպչուն մտքերի առկայության դեպքում:
• Ըստ ներկայացվող խնդիրների՝ անհրաժեշտ տեղեկատվության տրամադրում համապատասխան ուղղվածություն ունեցող բուժհաստատությունների վերաբերյալ:

     Այսպիսով, եթե դուք հայտնվել եք կյանքի դժվարին իրավիճակում, ունեք անելանելիության, միայնակության զգացում, բացասական բնույթի մտքեր կամ պարզապես հոգեբանական խորհրդատվության կարիք եք զգում, զանգահարե՛ք, և մեր ծառայության հոգեբան մասնագետները կարձագանքեն ձեզ շատ կարճ ժամանակահատվածում օրվա ցանկացած ժամի:

      Հիշե՛ք, որ օգնության դիմելը ոչ թե թուլության, այլ համարձակության դրսևորում է, քանի որ այն մատնանշում է փոփոխություններին ընդառաջ գնալու ձեր քաջ պատրաստակամությունը:

 

Թեժ գիծ՝  010 36 06 84
Էլ.փոստ՝  psychologist@mes.am